«Խորհրդային փորձառությունն ու ժառանգությունը Հայաստանում - 2» միջազգային գիտաժողով

Երք, 06/13/2023 - 10:00 - Հնգ, 06/15/2023 - 16:00

 ՀՀ ԳԱԱ Հնագիտության և ազգագրության ինստիտուտը և Միչիգանի Համալսարանի Դիրբորնի մասնաճյուղի Հայագիտական հետազոտությունների կենտրոնը 2023 թ. հունիսի 13-15-ը Երևանում կազմակերպում են գիտաժողով՝ նվիրված Հայաստանի խորհրդային անցյալին և ժառանգությանը:

✅Գիտաժողովի քննարկման թիրախում լինելու է խորհրդային կարգերի յոթանասուն տարիների (1920-1991թթ․) ազդեցությունը Հայաստանում: Այն անդրադառնալու է խորհրդահայ հասարակության պատմությանը՝ ներառելով նաև քաղաքականության, տնտեսության և մշակույթի կարևորագույն զարգացումներին առնչվող խնդիրներ: Նախապատվությունը կտրվի մասնակցության այն հայտերին, որոնք Հայաստանի խորհրդային փորձի լուսաբանման համար կօգտագործեն կարևոր տեսական ու մեթոդաբանական մոտեցումներ:

✅Գիտաժողովի ընդհանուր նպատակն է վերլուծել Խորհրդային Հայաստանի զարգացման շարժընթացն այնպիսի տեսական գործիքակազմով ու մեթոդաբանությամբ, որոնք մշակվել են խորհրդային անցյալն ավելի լայն համատեքստում վերլուծող ուսումնասիրողների կողմից: Եվ հակառակը, Խորհրդային Հայաստանի փորձառության վերլուծությունը կարող է օգտագործվել այդ մոտեցումները վերանայելու, քննադատելու և վիճարկելու տեսանկյունից:

✅Զեկուցումները կարող են քննարկել նաև հարցեր այն մասին, թե ինչպիսի վերաբերմունք կա խորհրդային ժառանգության հանդեպ Հայաստանում և սփյուռքում՝ 1991 թ. անկախության հռչակումից ի վեր։

➡️Գիտաժողովի առաջին մասն անցկացվել է 2022 թ. հոկտեմբերին, Միչիգանի Համալսարանի Դիրբորնի մասնաճյուղի Հայագիտական հետազոտությունների կենտրոնում։ Երկրորդ մասը կանցկացվի Երևանում:

➡️Հայտերը պետք է ներկայացնեն նոր ուսումնասիրություններ։ Նախապես հրատարակված կամ որևէ այլ գիտաժողովում ներկայացված հետազոտությունները կմերժվեն:

Հայաստանում խորհրդային փորձառությունն ու նրա ժառանգությունն ուսումնասիրող հետազոտողները գիտաժողովին մասնակցելու համար կարող են ներկայացնել հայտերը (զեկուցման վերնագիրը, մինչև 300 բառ ամփոփագիրը և հեղինակի կարճ կենսագրությունը) ⏰ մինչև 2023 թ. մարտի 10-ը՝ լրացնելով առցանց դիմումաձևը հետևյալ հղումով․ <https://forms.gle/fvtTmBEomqReaEHUA>:

Հայաստանից դիմող հայտատուների ամփոփագրերն ու կենսագրությունն անհրաժեշտ է ներկայացնել երկու լեզվով՝ անգլերեն և հայերեն։

Գիտաժողովի աշխատանքային լեզուներն են հայերենն ու անգլերենը՝ համաժամանակյա թարգմանությամբ։ Բարձրորակ զեկուցումներ կարող են ընդունվել նաև ֆրանսերեն կամ ռուսերեն լեզուներով, պայմանով, որ մասնակիցը նախապես կազմկոմիտեին կներկայացնի նաև զեկուցման մանրամասն անգլերեն ամփոփագիրը կամ ամբողջական տեքստը։ Զեկուցման անգլերեն տարբերակը նախապես կտրամադրվի գիտաժողովի մասնակիցներին։

Գիտաժողովի հայտերի ընտրության արդյունքները կհայտարարվեն 2023 թ. ապրիլի 10-ին:

Գիտաժողովի կազմկոմիտեն ակնկալում է, որ բանախոսները, հատկապես նրանք, ովքեր աշխատում են համալսարաններում կամ գիտահետազոտական կենտրոններում, գիտաժողովին մասնակցելու համար անհրաժեշտ ճանապարհածախսի միջոցները կհայթայթեն իրենց համապատասխան հաստատություններից: Այլ աղբյուրներից դրամական աջակցություն չունեցող հայտատուները գիտաժողովի կազմկոմիտեին պետք է ներկայացնեն նաև ճանապարհածախսի օժանդակություն ստանալու հայտ։

✔️Գիտաժողովի մասնակիցների կեցության և սննդի ծախսերը կապահովի կազմկոմիտեն:

mailՀավելյալ հարցերի դեպքում կարող եք դիմել կազմկոմիտեին <iae.anthropology@gmail.com> էլ-հասցեով:

Լուսանկարը՝ Մաքս Սիվասլյանի։

Send to